Kryeministri Rama, u ka ofruar një zgjidhje të gjithë atyre që kanë punuar në të zezë dhe nuk përfitojnë nga paga e luftës, për shkak se nuk figurojnë të regjistruar. Në një komunikim LIVE, kreu i qeverisë u ka prezantuar një ofertë, duke thënë se do të përfitojnë shpërblim financiar të gjithë ata që marrin guximin të denoncojnë punëdhënësin ose kompaninë.
“Punën në të zezë ne e kemi luftuar me të gjitha forcat. Asnjë vend, dhe këtë e them me përgjegjësi. Asnjë vend në planet, askush nuk në asnjë paketë që kemi parë deri më sot një shumë për ata që punojnë në të zezë. Për një arsye të thjeshtë si identifikohen.
Ata që punojnë në të zezë, duhet të kenë kurajon që të denoncojnë. Ne po bëjmë gati edhe një shpërblim financiar, për ata që do të thonë se unë kam punuar në të zezë në filan kompani, dhe sot nuk kam asnjë të ardhur. Sepse jo se nuk kam punuar, por s’me ka regjistruar pronari.
Ka nga ata që kanë frikë. Atëherë si ta zgjidhim këtë, nëse ti nuk ke kurajo që ta denoncosh këtë?!
Nëse s’ka nga brenda një zë, atëherë nuk zgjidhet edhe pse në shumë raste ne kemi arritur të bëjmë spostime nga e zeza në punë, të regjistruara falë presionit që kemi ushtruar për kompanitë.
Brenda 24 orëve, ne do të kemi këtë ofertë të re për të gjithë ata që kanë punuar në të zezë. Do tu japim një shpërblim financiar dhe do të marrin përsipër që ne ta ndjekim deri në fund punën e tyre. Do të kërkojmë nga pronarët e tyre të jenë në mbështetje të kësaj nisme, përndryshe do të duhet të përballen me ligjin”.
