Në adresë të emisionit “BOOM” në RTV Ora mbërriti shqetësimi i disa prindërve, në lidhje me kushtet e urgjencës së spitalit të fëmijëve Fier.
Sipas tyre, kushtet lënë shumë për të dëshiruar, dhe urgjenca e fëmijëve është vetëm një dhomë me 5 krevatë.
Kur ka viroza, urgjenca mbushet plot dhe nuk ke ku të vendosësh fëmijën për një serum.
Gazetarja e “BOOM”, pas këtij denoncimi shkoi të shohë fillimisht situatën, nëse ky denoncim qëndronte apo jo.
Dhe në fakt rezultoi i vërtetë, urgjenca e fëmijëve në Fier përbëhej nga një dhomë për infermierin, një për mjekun, vetëm një dhomë për fëmijët dhe dy banja, një për personelin, një për fëmijët. Të 5 shtretërit në momentin që ishte “BOOM”, ishin të zënë.
Gazetarja pyeti infermieret nëse do i vinte një fëmijë tjetër, ku do e vendosnin, por ato kërkuan që gazetarët të dalin jashtë e të mos filmojnë pa leje. Më pas erdhi nëndrejtori i spitalit, i cili kërkoi që gazetarët të ktheheshin në Tiranë, dhe nga aty t`i nisnin një kërkesë me shkrim, por në bashkëbisedim me gazetaren pranoi që urgjenca e pediatrisë Fier për momentin ishte vetëm një dhomë.
Sipas tij, spitali do të rikonstruktohej. Por këtë nuk na e tha zyrtarisht, por shkallëve, duke ecur me gazetaren.
Të mendosh që urgjenca e Fierit duhet t`i shërbejë Roskovecit, Ballshit dhe qytetit të Fierit, në një dhomë me 5 shtretër./oranews
