Nis kryqëzimi i të dhënave nga identifikimi biometrik për të zbuluar votimet e më shumë se një herë të një personi. Identifkimi elektronik i zgjedhësve, i cili nënkupton identifikimin e zgjedhësit nëpërmjet verifikimit të të dhënave personale nga leximi me pajisje dhe përqasja e tyre me bazën elektronike të të dhënave, si dhe regjistrimi në pajisje i shenjave daktiloskopike, ishte një nga risitë e zgjedhjeve të 25 Prillit për në Kuvend.
Aprovimi i këtij mekanizmi të ri në Kodin Zgjedhor ishte kërkuar me forcë nga PD dhe kishte qenë pjesë e konsensusit të arritur ndërmjet palëve për ndryshimet e Kodit Zgjedhor në Korrik 2020. Nëpërmjet identifikimit elektronik synohej të eleminohej votimi më shumë se një herë, në të njëjtën qendër votimi apo qendra të tjera, të eleminohej votimi për të tretët apo votimi familjar.
Ndërkaq, nga KQZ kanë konfirmuar se pas denoncimit të Partisë Demokratike në KQZ, se disa persona mund të kenë votuar për më shumë se një herë në qendër votimi, kanë nisur hetimet administrative. Për të verifikuar këto dyshime, KQZ ka nisur të verifikojë pajisjet e identifikimit. Partia Demokratike ka kërkuar që të dhënat që do të përfitohen nga procesi i kryqëzimit ti vihen në dispozicion, për të parë nëse ka pasur ose jo votim të dyfishtë dhe nëse kjo ka ndikuar tek rezultati i zgjedhjeve. Edhe LSI ka kërkuar filimimet e votimeve në disa qarqe ku dyshon se vota i është tjetërsuar.
