Ministrja e Drejtësisë, Etilda Gjonaj ka njoftuar shkarkimin nga puna të gjashtë punonjësve në Hipotekën e Durrësit, për shkelje ligjore.
Në një deklaratë për mediat, Gjonaj njoftoi se do i shkohet deri në fund cdo denoncimi për shkelësit e ligjit.
“Zyrat vendoret të pasurisë së paluajtshme në Durrës kanë qenë dhe vijojnë të jenë në qendër të kontrollit. Nga ana tjetër do të kemi parasysh çdo denoncim në platformë dhe do t’i shkojmë deri në fund dhe do të marrim çdo masë për shkelësit e ligjit. Në muajin janar për shkelje në detyre është shkarkuar nga detyra regjistruesi i zyrës vendore të Durrësit.
Bazuar në informacionet e marra mbi praktika abuzive, Task Force ka ushtruar kontroll tjetër në këtë zyrë dhe nga praktikat e monitoruara rezultojnë aplikime të trajtuara jashtë afateve, sistemi online nuk pasqyron situatën aktuale, është gjendur se ai nuk është administruar dhe përdorur në të gjitha fazat e tij, nuk është vepruar në përputhje me kërkesat për arkivimin e teknikave në zyrat e Hipotekës duke bërë referenca të shërbimeve të paarkivuara e duke sjellë pasoja në origjinën e pasurisë. Pas kësaj u vendos largimi për 6 specialistë të zyrës dhe vërejtje më shkrim për 10 të tjerë jurisë dhe hartografë, duke e çuar në total numrin e masave në 31 masa”, tha ndër të tjera Gjonaj.
