Kreu i grupit parlamentar në PS, Taulant Balla i ftuar në “News24” ka folur për shtrëngimet në Kodin Penal për personat që abuzojnë me sigurinë ushqimore, si dhe për fenomenin e blerjes së votës.
I pyetur nga gazetari se çfarë masash do të merren për të parandaluar shit-blerjen e votës, Balla pohoi se paraqiten përmirësime në kuadrin ligjor, ndërsa shtoi se të gjithë ata që nuk zbatojnë ligjin dhe përfshihen në këtë fenomen do të ndëshkohen me burg.
“Blerja e votës është një problem edhe në disa vende evropiane. Në Rumani ka pasur mbi 200 kallëzime penale, po ashtu në Bullgari ka pasur raste pafund të shkëmbimit të votës kundrejt parasë. Një gjë është e sigurt, se Shqipëria ka kuadrin më të ashpër në kod dhe rrezikon të dënohesh deri në 5 vite burg për shkeljet. Sot kemi depozituar një paketë shtrëngimi në Kodin Penal, të cilat fillojnë nga siguria ushqimore. Ne shohim sot një grup politikanësh të korruptuar që po u pengojnë rrugët shqiptarëve të ndershëm, që të shkojnë për një vaki apo për një gëzim tek të afërmit. Ne këtë e kemi bërë vetëm dy herë në dy momente, kurse këtë fazë të tyre kemi disa vite që e shohim”, deklaroi Balla.
