Gazetari Elton Qyno ka treguar se nga kush e mori goditjen e madhe ish-ministri Tahiri, duke vënë në dukje se ka qenë në ‘hasmëri’ dhe me PS-në. Ish-Ministri i Brendshëm Saimir Tahiri u dënua nga Gjykata e Posaçme e Apelit me 3 vite e 4 muaj burg. Gazetari, në një lidhje të drejtpërdrejt për “Ora News”, tha se gjykata nuk u mendua për dënimin e Tahirit gjatë 12 ditëve që kërkoi kohë, por vendimin e mori në 2 orët e fundit para se të shpallej.
“Ata nuk janë menduar fare në periudhën 12 ditore që e kërkuan. Vendimi u dha në 2 orët e fundit të seancës së sotme. Saimir Tahiri ka pasur kundërshtarët politik jo vetëm Partinë Demokratike, por edhe ka një lloj ‘hasmërie’ edhe nga PS që e ka luftuar vazhdimisht në çdo lloj forme të mundshme. E goditën edhe në institucionet e drejtësisë”.
Avokati i Tahirit e cilësoi skandaloz vendimin e gjykatës, ndërsa paralajmëroi se do i drejtohet Gjykatës së Lartë. Maksim Haxhia deklaroi se Tahirit i kishin sugjeruar dhe arratisje, por nuk e bëri. “Saimir Tahiri i kishte të gjitha mundësitë edhe të mos vinte. Kishte edhe njerëz që të mos paraqitej. Por ai tregoi disponueshmëri”, tha avokati.
Sipas tij, ky ishte një vendim për të njollosur Tahirin. “I kishim diskutuar edhe më parë vendimet. Nëse kjo është Reforma që të luftohet korrupsioni, duke futur në burg Tahirin, të gjithë politikanët të vishen trashë”, tha ai.
Avokati sulmoi edhe Reformën në Drejtësi, duke kujtuar se Tahiri u dënua për të treguar suksesin e saj. “Mungesa e trupit gjykues, të paktën duhet të dilte dhe të thoshte që shtyhet vendimi. Kjo tregon edhe njëherë që drejtësia ka marrë një supermarci edhe në atë presion që është ndodhur zakonisht. Nëse reforma është që të futet në burg Saimir Tahiri, atëherë mund të them edhe me sarkazëm që të gjithë pushtetarët duhet të vishen trashë në kohë dimri. Ne prisnim pafajësinë totale”, tha avokati.
