Ambasadorja e SHBA-ve në vendin tonë, Yuri Kim ka reaguar në lidhje me vendimin e GJKKO, për të dënuar me dy vite burg, ish-Kryeprokurorin e Përgjithshëm, Adriatik Llalla.
Kim u shpreh se SPAK po jep gjithnjë e më shumë rezultate, teksa shtoi se Llalla është një nga ish-zyrtarët e lartë që iu ndalua nga SHBA për korrupsion.
Sipas diplomates amerikane, vendimi i sotëm tregon se askush, pavarësisht se sa i fuqishëm është, nuk është mbi ligjin.
”SPAK po jep gjithnjë e më shumë rezultate. Kjo çështje, e cila përfshin një ish-zyrtar të lartë të ndaluar nga SHBA për korrupsion të rëndësishëm, tregon se askush – pavarësisht sa i fuqishëm – nuk është mbi ligjin. Kur TË GJITHË janë të barabartë para ligjit, të GJITHË kanë dinjitet. Ky është dinjiteti i vërtetë..’’, shkruan ambasadorja Kim në rrjetin social, Twitter.
Good to see SPAK delivering more and more results. This case, which involves a former high official barred from ?? for significant corruption, shows that no one – no matter how powerful – is above the law. When ALL are equal before the law, ALL have dignity. That is true dignity. https://t.co/o2dkuLW61D
— Ambassador Yuri Kim (@USAmbAlbania) May 20, 2021
Ditën e sotme, GJKKO e ka dënuar Llallën edhe me 5 vite përjashtim nga mbajtja e posteve publike. Po ashtu, Llallës i është vendosur sekuestro edhe mbi pasurinë e ish-zyrtarit të lartë të drejtësisë.
Ai akuzohet për disa vepra penale që përfshijnë “Refuzim për deklarim, mos deklarim, fshehje ose deklarim i pasurive, interesave privat të personave të zgjedhur dhe nëpunësve publik ose i çdo personi tjetër që ka detyrim ligjor për deklarim”.
Adriatik Llalla u hetua edhe për pastrimin e parave, por në finale ai u dërgua për gjykim vetëm për fshehje të pasurisë.
