Anëtari i Kryesisë së PD, Eno Bozdo, ka publikuar një video ku kryeministri Rama dhe guvernatori i Bankës së Shqipërisë, Gent Sejko, përcjellin shifra të ndryshme lidhur me shumat e alokuara për garancinë sovrane që u vjen në ndihmë bizneseve për pagat e punonjësve.
Rama thotë se janë alokuar 22 milionë euro e ndërsa Sejko 8.5 milionë euro. Në një status në Facebook, Eno Bozdo shprehet se prej shtatë vitesh, shqiptarët dhe ekonomia e tyre po lëngojnë nga ‘Ramavirusi’. Sipas tij, simptomat akute të saj janë krimi, korrupsioni dhe mashtrimi.
Bozdo citon se Shqipëria e meriton një të ardhme të mbarë, dhe kjo do të realizohet kur në pushtet të mos jetë kryeministri Rama.
Statusi
Prej shtatë vitesh, shqiptarët dhe ekonomia e tyre po lëngojnë nga Ramavirusi.
Kjo është një epidemi shumë më e rëndë se vetë Covid-19. Simptomat akute të saj janë krimi, korrupsioni dhe mashtrimi, si ky në videon më sipër.
Ramavirusi shkaktoi fillimisht braktisjen e vendit nga qindramijëra shqiptarë. Sot Ramavirusi ka bërë që të kemi qeverinë e vetme në botë që nuk ndihmon familjet shqiptare, biznesin prodhues, bujqësinë dhe turizmin në këto ditë shumë të vështira.
Shqipëria nuk do të njohë të ardhme përsa kohë Rama dhe virusi i tij të qeverisin vendin. Por Shqipëria e meriton një të ardhme të mbarë dhe do ta ketë atë.
E ardhmja është pa “RamaVirus”.
