Dhjetëra persona, mbështetës të Partisë Demokratike, kanë përfunduar në spital pas mitingut në bulevardin “Dëshmorët e Kombit”.
Mësohet se rreth 50 persona janë paraqitur në QSUT me simptoma si skuqje fytyre, djegie, lotim apo shqetësime në sy.
Kjo anomali dyshohet se mund të jetë shkaktuar nga një lloj pluhuri në zonën ku po mbahej mitingu i PD-së, ç’ka ka shkaktuar edhe irritimet në sy tek disa qytetarë.
Megjithatë, ende nuk ka një përgjigje zyrtare se për çfarë bëhet fjalë as nga spitali, por as nga policia, ndërsa kjo e fundit ka marrë masa për të saktësuar se nga se iu shkaktuan këto simptoma simpatizantëve të PD-së.
Mes personave që kanë pasur shqetësime është edhe kreu i PD-së, Lulzim Basha, i cili mësohet se ka mbërritur në ambientet e spitalit rreth orës 04:39 të mëngjesit.
Të sinjalizuar për këto probleme, policia ka dalë për verifikim në terren, ku një grup ekspertësh të kriminalistikës kanë kryer kontrolle në Bulevard në orën 07:00.
Në orët vijim pritet një përgjigjet e saktë nga Policia dhe Spitali se çfarë ka ndodhur.
