Një person është ekzekutuar me armë gjahu mesditën e kësaj të premteje në qytetin e Vlorës. Viktima është Fatmir Hodo, kryetar i njësisë administrative në fshatin Kotë.
Ngjarja e rëndë ndodhi në orën 14:55 në një lokal të fshatit. Autori i kësaj ngjarjeje, është 44-vjeçari Admir Delaj. Ata kishin duke pirë bashkë, kur ky i fundit ka marrë çiften dhe e ka qëlluar Hodon në derë të lokalit, duke e lënë të vdekur në vend.
Forca të shumta policore u vunë në ndjekje të autorit të dyshuar të kësaj ngjarjeje të rëndë duke e arrestuar atë pak kohë më vonë. Grupi hetimor po kryen hetimet në lidhje me sqarimin e rrethanave dhe zbardhjen e plotë të situatës.
Selenicë, Vlorë
Policia identifikon dhe kap në kohë rekord autorin e vrasjes së 64-vjeçarit, ndodhur në fshatin Kotë të Selenicës.
Arrestohet pas afro një ore ndjekje, autori i dyshuar, 44-vjeçari nga fshati Gumenicë.
Në fshatin Kotë, rreth orës 14:55, në hyrje të një lokali, dyshohet se shtetasi Admir Delaj ka qëlluar me armë gjahu shtetasin F. H., 64 vjeç, banues në fshatin Gumenicë, i cili ka humbur jetën.
Policia e Vlorës dhe e Selenicës, me të marrë njoftim për ngjarjen, kanë shkuar menjëherë në vendngjarje ku kanë identifikuar autorin e ngjarjes shtetasin Admir Delaj i cili pas vrasjes ishte larguar menjëherë me automjetin e tij.
Forcat e Policisë u vunë në ndjekje të autorit ku pas afro një orë ndjekje, u bë e mundur kapja e tij, në dalje të banesës në fshatin Gumenicë ku kishte mbyllur mjetin dhe po tentonte të largohej.
Nga hetimet paraprake të kryera dyshohet se ngjarja ka ndodhur nga një konflikt i çastit, pasi dy shtetasit e mësipërm kanë konsumuar pije alkoolike bashkë disa minuta para se të ndodhte ngjarja.
Grupi hetimor ka sekuestruar në cilësinë e provës materiale armën e krimit (armë gjahu “Çifte”), si dhe automjetin me të cilin u largua nga vendi i ngjarjes (Fuoristradë Benz ML).
Gjithashtu nga kontrolli i ushtruar në banesë është gjetur dhe sekuestruar edhe një armë tjetër gjahu tip “Çifte” e cila nuk ka lidhje me ngjarjen, por rezulton pa lejen përkatëse.
Grupi hetimor i kryesuar nga Prokurori po vijon punën për zbardhjen e plotë të rrethanave të ngjarjes.
Materialet në ngarkim të shtetasit Admir Delaj, në përfundim të veprimeve të para hetimore do ti kalojnë Prokurorisë së Rrethit Gjyqësor Vlorë për veprime të mëtejshme për veprën penale “Vrasje me dashje”.
