Kryetarja e LSI-së, Monika Kryemadhi ka mbledhur këtë pasdite të së enjtes Komitetin Drejtues Kombëtar të LSI. Kjo mbledhje vjen pas konferencës që mbajti me gazetarët pak më herët, kreu i PD, Lulzim Basha.
Kryemadhi ka folur edhe për zhvillimet e fundit, dhe votimin e rezolutës sot kundër Ilir Metës në Kuvend, për të cilën u shpreh se nuk mund të zgjatet sepse ka konflikt interesi.
Sa i përket dekretit të Presidentit Kryemadhi theksoi se “Dua të them që 30 qershori është një datë e cila do të mbahet mend në historinë e Shqipërisë, ku për hir të së vërtetës dektreti i Presidentit ndaloi një konflikt civil.”
Gjatë fjalës së saj kryetarja e LSI është shprehur se Edi Rama, të cilin e ka cilësuar si një të sëmurë psikik, është një hajdut i madh dhe se korrupsioni i tij ka kaluar çdo përmasë.
“Rama e ka mbyll hesapin me Europën sepse hesapi i tij nuk është hesap që ka të bëjë me trafikun e drogës, me ekspozitat e tij artistike, por është shumë i madh me të ardhmen e shqiptarëve, që është shumë më e rëndësishme se karrigia e Ramës, apo Metës, apo e çdo deputeti.
Dua të ndalem pak te diskutimi i sotëm në Parlament, mos u merrni me to, për ne s’ka rëndësi kur mbahen zgjedhjet, për ne ka rëndësi standardi jo data. Debati qesharak në Parlament, është për të hequr vëmendjen, unë nuk mund të flas sepse kam konflikt interesi. Është qesharak sepse asnjëri nga ata nuk ka target të flasë për vendime kushtetuese.
Sot më shumë se kurrë strukturat tona duhet të jenë shumë të qarta, sepse kemi përballë një njeri që nuk duket normal. Por jo vetëm kaq, por kemi një grup të strukturuar kriminal. Dua të them që 30 qershori është një datë e cila do të mbahet mend në historinë e Shqipërisë, ku për hir të së vërtetës dektreti i Presidentit ndaloi një konflikt civil. Vetë Edi Rama është personi kryesor që i intereson dhuna dhe konflikti, pasi i jep rolin e viktimës, por të vetmit viktima janë shqiptarët që po grabiten.
30 qershori, një ditë konfliktuale, do të ishte një ditë ndër më të lumturat për qarqet antishqiptare”, tha Krtyemadhi.
