Në një lidhje të drejtpërdrejtë për ‘Euronews Albania’, kryeministri Rama ka thënë se klubet e futbollit nuk do të marrin mbështetje ekonomike. Mjaft i prerë në qëndrimin e tij, ai u shpreh se klubet e futbollit nuk kanë asnjë arsye, çfarë ti kërkojnë qeverisë dhe arkës së shtetit. Duke argumentuar këtë çështje, Rama shtoi se klubet e futbollit deklarojnë paga të rreme sikur janë kompani fasone, dhe japin paga të majme.
“Paketa nuk do të rishikohet, por do të zgjerohet. Është një paketë që në bazën e saj ka ato që janë më në nevojë dhe pastaj do të zgjerohet. Sa i përket klubeve të futbollit, unë mendoj që ato nuk kanë çfarë i kërkojnë fare qeverisë dhe arkës së shtetit, për një sërë arsyesh. Por këtu do të sjell atë më të thjeshtën fare. Klubet e futbollit deklarojnë paga të rreme, sikur janë kompani fasone dhe japin paga të majme. Klubet e futbollit le të shohin rreth e rrotull se çfarë bëjnë klubet në vende të tjera dhe të adoptohen me këtë luftë”.
Sipas kryeministrit, klubet e sportit duhet të gjejnë mënyrën e tyre për të mbijetuar. Sipas tij, kjo nuk është koha e duhur për të ndihmuar futbollin, por është nevoja jetike për të mbijetuar.
“Kjo nuk është koha për të ndihmuar futbollin, por koha për të ekzistuar. Klubet e futbollit duhet të garantojnë ekzistencën dhe jo fitimin e munguar. Meqë kanë deklaruar paga të rreme në masën më të madhe të tyre, është mirë të mos bëhen pjesë e atyre që ankohen dhe që kërkojnë, pasi nuk ka pikë lezeti”, tha Rama për klubet e sportit në Shqipëri.
