Prej kohësh, çështja më e nxehtë që lidhet me Shqipërinë dhe Kosovën, është krijimi i dy skuadrave përfaqësuese dhe përçarjet në lidhje me zgjedhjen e futbollistëve. Por, ish-trajneri i Prishtinës, Ejup Mehmeti ka folur për mediat dhe në një intervistë për “Gazeta Olle”, është shprehur se fajtor për këtë ndarje, është vetëm presidenti i FSHF-së, Armand Duka.
Ai shton se të gjithë shqiptarët e Kosovës kërkojnë bashkim me Shqipërinë, por kjo nuk mund të arrihet duke qenë se Duka e ka privatizuar Kombëtaren dhe sipas tij, është një njeri i korruptuar.
“Dy milionë shqiptarë nga Kosova e duan bashkimin kombëtar. Por si mund të ndodh kjo kur Armand Duka e ka privatizuar Kombëtaren e Shqipërisë.
Më mirë që jemi dy ekipe, pasi që tani talentet kosovarë nuk po trokasin në derën e Dukës së korruptuar. Këtë po e flas me fakte e dëshmi, si ato të Fatmir Vatës. Tri herë i jam ofruar Shqipërisë si asistent, por më kanë refuzuar.
Ëndrrat tona për bashkim do të mbeten ëndrra. Përfaqësuesja e Kosovës do të jetë shumë më e fortë se Kombëtarja e Shqipërisë. Përpos Hysajt dhe Xhakës, asnjë lojtar i Shqipërisë nuk ka kapacitet të luajë për Kosovën”, u shpreh Mehmeti.
