Zyrtarë të lartë të Partisë Demokratike akuzuan të hënën mazhorancën se po pengon çdo komision hetimor ndaj ish-ministrit të Brendshëm Saimir Tahiri.
Në një prononcim për median pas mbledhjes së konferencës së kryetarëve, nënkryetari i PD-së, Edi Paloka tha se “komisionin hetimor e kërkojmë ne dhe këta kërkojnë kohë që të ndryshojnë objektin e hetimit. Kjo është gjëja më absurde. T’i kërkosh opozitës që të kërkojë objektin e hetimit siç e kërkon mazhoranca. Ata nëse duan lë të ngrenë komision të tyrin hetimor, siç kanë bërë edhe herë të tjera. Për mua dhe për ne, është qëndrim i qartë, nuk duan të hetojnë as Saimir Tahirin dhe as atë që ndodhi me drogën në Shqipëri. Nuk ka asnjë arsye tjetër përse kërkojnë ta pengojnë këtë komision.”
Ndërsa kryetari i grupit parlamentar të PD-së Edmond Spaho, tha se mazhoranca po përpiqet të fitojë kohë “në mënyrë që të eliminohen provat, të hiqen dëshmitarët si në rastet e ekstradimit të Seitit në Itali apo lirimit të Orest Sotës. Kontestimet janë ato shabllonet, se objekti i hetimit është i gjerë dhe se këtu ka vend për dy apo tre komisione hetimore. Në fund kërkuan kohë për ta parë më mirë kërkesën tonë dhe për të ardhur me një vendim përfundimtar.”
Ndërsa kryetari i Grupit Parlamentar në PS-së, Taulant Balla, tha se në çështjet e shtjelluara në projekt-vendim tejkalojnë kërkesën. “Kërkesa e tyre në vendim ka tre komisione hetimore, jo një. Ne jemi të gatshëm t’i ndihmojmë të ngrenë edhe tre komisione hetimore, por dëshira jonë është që të përmblidhen në një komision hetimor, për të kursyer edhe shpenzimet e Kuvendit.”
