Kreu i Këshillit të Lartë të Prokurorisë, Gent Ibrahimi ka deklaruar se deri në 14 dhjetor, Shqipëria do të ketë Kryeprokuror të Përgjithshëm të ri. Ai këtë deklaratë e bëri ditën e sotme, pas mbledhjes së radhës së KLP-së, ku u përcaktua metodologjia e përzgjedhjes.
“Kuvendi mund të emërojë edhe të tretin e renditur nga ne, edhe të dytin, natyrisht edhe të parin. Shpresoj të bëjë këtë të fundit. Por në rast se nuk i mobilizon këtë numër votash, atëherë renditja jonë prevalon dhe prokurori do të jetë ai që ne rendisim të parin. Kështu që në rastin më të keq, 30 ditë nga e pasnesërmja (e enjte, 14 nëntor), Shqipëria do të ketë Prokurorin e ri të Përgjithshëm”, tha Ibrahimi.
Të mërkurën do të kryhen intervistat me kandidatët për Prokuror të Përgjithshëm. Në garë janë, Arta Marku, Fatjona Memçaj dhe Olsian Çelaj. Të enjtën do të bëhet lista me renditjen e pikëzuar e do t’i dërgohet Kuvendit.
Nëse brenda 30 ditëve nga ky moment, nëse asnjë prej kandidatëve nuk arrin të marrë 84 vota në Parlament, atëherë kandidati i renditur i pari në listën e KLP shpallet automatikisht Prokuror i Përgjithshëm.
