Deputeti i PD-së, Tritan Shehu reagon pas vendimit të qeverisë shqiptare për të dëbuar dy diplomatë rusë.
Shehu deklaron se vendimi është një detyrim për Shqipërinë, pasi është anëtare e NAT0-s. Vendimi i qeverisë Shqiptare edhi në vijim të sanksioneve të marra nga të gjitha vendet e NATO-s pas helmimit të ish-spiunit rus në Britani, gjë për të cilën akuzohet Moska.
Në një prononcim për “Report TV”thekson se kjo është një lëvizje në bllok e të gjitha vendeve të NAT0-s. “Çështjet nuk shtrohen sa do të ndikojë në marrëdhëniet tona me Rusinë, vendimet janë në bllok dhe zgjidhen në bllok. Rëndësi ka që ne të reagojmë në bllok”.
“Shqipëria është anëtare e NATO-s dhe është e detyruar të solidarizohet me vendet e NATO-s, aq më tepër kur cenohet sovraniteti i njërit prej këtyre vendeve, është një detyrë dhe obligim për ne. Ne e kemi deklaruar, që në çështjet e sigurisë ne do të ndjekim vetëm SHBA. Pra këtu kemi të bëjmë me çështje sigurie dhe qëndrim amerikan dhe numri i konsiderueshëm vendesh anëtare të NATO-s. Nuk është thjeshtë dëshirë, por obligim për nivelet e sigurisë, prandaj e konsideroj një hap normal” tha ai.
Largimi i dy diplomatëve rusë, ngre pyetjen nëse kërcënohet Shqipëria? “Problemet e kërcënimit janë më shumë se për Shqipërinë, diskutohen në bllok për të gjitha vendet e NATO-s dhe derisa merren vendime të tilla, tregon se gjendja është serioze dhe duhet një reagim serioz, për të frenuar çdo element agresiv ndaj bllokut të NATO-s” deklaron Tritan Shehu.
Ministria për Evropën dhe Punët e Jashtme njofton se veprimtaria e dy diplomatëve rusë në Shqipëri nuk përputhet me statusin e tyre diplomatik. Nota verbale i është komunikuar ambasadorit të Rusisë në Shqipëri, Aleksandër Karpushin.
