Rusia ka treguar “muskujt” ndaj Shqipërisë në lidhje me vendimin e deportimit të dy diplomatëve rusë nga Shqipëria. Përfaqësuesit e shtetit rusë në Tiranë kanë paralajmëruar Shqipërinë për veprimin tyre në lidhje me diplomatët, ndërkohë ka parashikuar edhe një përgjigje konkrete.
Zëvendës ambasadori rus në Tiranë Dimitry Kazmin në një prononcim për mediat ka shprehur keqardhjen për vendimin e Shqipërisë që iu bashkua SHBA dhe NATO-s për të dëbuar diplomatët rusë pas përplasjes mes Moskës dhe Londrës.
Dimitry Kazmin shprehet se ky vendim bie ndesh me përpjekjet e Rusisë për përmirësimin dhe intensifikimin e marrëdhënieve dypalëshe. Ai shton se vendimi është i pa bazuar dhe se koha do të tregojë një gjë të tillë, ndërsa paralajmëron për kundërpërgjigje.
“Lidhur me vendimin e autoriteteve shqiptare për largimin e dy diplomateve ruse, na duhet te shprehim keqardhjen për këtë rast. Ky vendim bie ndesh me përpjekjet tona për përmirësimin dhe intensifikimin e marrëdhënieve dypalëshe.Vendimi është i pabazuar dhe koha do ta tregoje këtë. Në këtë situate nuk mund te përjashtohen edhe kundërmasat nga pala ruse. Edhe njëherë tjetër dua te shpreh keqardhjen për çka ndodhi. Veprimi i palës shqiptare i kundërvihet frymës pozitive për marrëdhënie te mira midis dy vendeve.Pozitën zyrtare ju do të merrni në të ardhmen e afërt”-shkruan Shqiptarja.com.
Shqipëria shpalli sot ‘non grata’ dy diplomatë rusë pas përplasjes mes Britanisë së Madhe dhe Rusisë. Dy diplomatët që janë dëbuar nga Shqipëria janë Vladislav Filipov, atashe ushtarak dhe Alexey Nikolaevich Balashov, sekretar i parë i ambasadës së Rusisë në Tiranë. Me vendimin e sotëm Shqipëria u bashkua me vendet e aleancës së NATO-s, që vendosën sanksionet pas helmimit të ish-spiunit rus në Britani, gjë për të cilën akuzohet Moska.