Liverpool dhe Bayern Munich u përballën në “Anfield” për sfidën e parë çerekfinale të Champions League. Pavarësisht se ishte një ndeshje që krijoi shumë raste për shënim dhe dhuroi mjaft emocione, rrjetat mbetën të paprekura. Në fundin e takimit pati një përplasje mes dy trajnerëve. Ishte Jurgen Klopp që u revoltua me Niko Kovac pasi ky i fundit kur mbaroj ndeshja shkoi të festonte me lojtarët para se të shtrëngonte dorën me trajnerin gjerman.
Kroati ka folur për këtë çështje dhe është shprehur se ky rregull funksionon në Angli dhe jo në Gjermani, prandaj kishte vepruar ashtu. Por gjithçka u mbyll aty për aty, pasi Kovac i kërkoi falje Kloppit. Ndërsa sa i përket sfidës së kthimit trajneri kroat shprehet se do të veprojë sipas mënyrës së tyre.
“Unë doja t’i jepja dorën Nikos, por ai shkoi mes lojtarëve të tij. Kur ai u kthye i thashë se po e prisja dhe ai më kërkoi falje. Unë i thashë nuk ka problem dhe ai më kërkoi sërish ndjesë. Kjo ishte”, tha Klopp.
Ndërsa Kovaç u justifikua: “Shkova të uroja Ribery që u bë baba. Në Gjermani është normale që të takosh lojtarët e tu pas ndeshjes, por ne jemi në Angli, ku në fillim takohen trajnerët. Kështu që i kërkova falje. Por në Gjermani do e bëjmë sipas mënyrës sonë”.
