Gianni de Biasi është me “pushime” prej disa muajsh, pasi u shkarkua nga posti i trajnerit të Alaves. Që pas largimit nga kombëtarja shqiptare trajneri italian nuk po sistemon dot karrierën e tij. Tashmë është gati ti futet sërish punës me një skuadër greke, ku nuk mungojnë elementet kuqezi.
Rezultatet aspak të mira në ndeshjet e fundit të Arisit kanë sjellë ditën e sotme largimin e trajnerit Pako Herrera. Ndërsa emra të shumtë po përfliten për të zënë vendin e të larguarit nga skuadra, përmendet dhe emri i ish-trajnerit të Kombëtares shqiptare. De Biasi në lidhje më këtë çështje ka folur për “gazzetta.gr” ku i ka lënë të hapur mundësitë për një transferim të tij.
“Unë e njoh skuadrën e Arisit, është një klub me shumë histori dhe mbështetës në Selanik. Dy ish-futbollistët e mi, Mavraj dhe Basha luajnë atje. Është një projekt interesant dhe do ta diskutoja padyshim, por deri tani askush nuk më kontaktuar nga klubi”–u shpreh ish-trajneri i Shqipërisë.
