Të gjithë e dimë se dashuria na bën të ndihemi mirë, por a e dini se çfarë thotë shkenca për efektet e saj në trupin tonë? Bright Side na tregon disa nga efektet mahnitëse të provuara shkencërisht që dashuria ka në mendjen dhe në trupin tuaj.
Dashuria lehtëson natyrshëm dhimbjet
Ne të gjithë e dimë se përqafimet na bëjnë të ndihemi mirë dhe janë ngushëlluese. Megjithatë, studimet e fundit kanë treguar se oksitocina (hormon që gjendet në tru dhe që nxit ndjesinë e qetësisë dhe afërsisë) e cila lëshohet gjatë një përqafimi që zgjat 10-20 sekonda mund të luftojë në mënyrë efektive dhimbjen, sidomos dhimbjen e kokës.
Për më tepër, vetëm duke parë një fotografi të të dashurit tuaj rrit durimin dhe zvogëlon dhimbjen. Truri ynë shoqëron foton e partnerit me një kënaqësi të këndshme e cila e bën çdo lloj dhimbje më të durueshme, duke vepruar si një analgjezik.
Nga një këndvështrim tjetër, shkencëtarët kanë vërtetuar gjithashtu se stimulimi seksual dhe sidomos orgazmat luajnë një rol të rëndësishëm në shmangien e dhimbjes. Kjo është veçanërisht e dobishme për dhimbjet kronike, simptomat e artritit dhe dhimbjet e tjera.
Dashuria kujdeset për zemrën tuaj
Studimet tregojnë se kur shprehim dashurinë përgjysmojmë ritmin e rrahjeve të zemrës. Kjo është më efektive në situatat stresuese dhe zvogëlon rrezikun e sëmundjeve të zemrës në kohë afatgjatë.
Përveç kësaj, oksitocina, hormoni i dashurisë që besohet të jetë një nga molekulat më mahnitëse në botë zvogëlon stresin, ul presionin e gjakut, redukton ankthin, rrit vetëbesimin dhe na ndihmon të shmangim dhe luftojmë depresionin.
Dashuria ndihmon trupin të luftojë sëmundjet
Dashuria, nga një shtrëngim duarsh te aktiviteti seksual, rrit prodhimin e endorfinës, e cila forcon sistemin tonë imunitar.
Në mënyrë të ngjashme, njerëzit me probleme fizike që marrin dashuri kanë një përgjigje më të mirë ndaj trajtimit mjekësor dhe motivim më të fortë për të luftuar sëmundjet.
Dashuria është trajtim i pagjumësisë
Hormonet e dashurisë (oksitocina dhe endrofina) pengojnë çlirimin e kortizolit, i cili është hormoni përgjegjës për stresin. Gjithashtu është vërtetuar shkencërisht se dashuria është një nga trajtimet më efikase për një gjumë të mirë gjatë natës.
Dashuria zvogëlon probabilitetin e të qenit i varur
Opiatet, kokaina, nikotina, alkooli krijojnë varësi, sepse ndikojnë në nivelin e dopaminës në trupin tonë. Dopamina është hormoni përgjegjës për ngutje drejt kënaqësisë dhe efekteve euforike.
Dashuria vepron në të njëjtën mënyrë. Megjithatë, përveç dopaminës, ajo gjithashtu rrit çlirimin e testosteronit dhe oksitocinës, që përbën kombinimin më të mirë për të luftuar e varësinë.
Me pak fjalë dashuria mbush jetën me kënaqësi dhe ekstazën që ju nevojitet. Në të njëjtën kohë, dashuria ju ndihmon të përballeni me tërheqjen nga rreziku dhe zvogëlon dëshirat tuaja.
Dashuria promovon jetëgjatësinë
Sondazhet tregojnë se njerëzit kur janë në një marrëdhënie, e sidomos në martesë, ndihen më të shëndetshëm dhe përfitojnë nga mënyra e shëndoshë e të jetuarit(duke përfshirë zgjedhjen e ushqimit, ushqimet e shëndetshme, pushim më i mirë, më pak stres etj.).
Të qenit çift ndihmon njerëzit të parandalojnë problemet dhe i bëjnë ata të prirur për të adresuar problemet fizike te mjeku. Kjo ka provuar se njerëzit e dashuruar dhe në një marrëdhënie të përkushtuar priren të jetojnë më gjatë.
Dashuria është terapi
Njerëzit shkojnë në terapi për shumë arsye, por kryesisht sepse duan të dëgjohen dhe të kuptohen. Nga të gjithë specialistët në botë, personi më i aftë dhe në dispozicion për t’ju ofruar një terapi gjithëpërfshirëse është partneri juaj.
Përkushtimi i dashurisë tuaj është si mendërisht edhe fizikisht ilaçi kryesor (dhe nganjëherë edhe i vetmi) për të përballuar depresionin, ankthet sociale dhe gjendjen fizike.
Dashuria dhe marrëdhëniet kuptimplota nuk na ndodhin kot. Ne zgjedhim të duam, të përmirësojmë marrëdhëniet tona, të sillemi ndryshe, dhe së fundi, zgjedhim të jemi të lumtur dhe të qëndrojmë të shëndetshëm.
Psikologu i madh Robert Sternberg thotë se “Nëse nuk e shpreh, edhe dashuria më e madhe mund të vdesë”. Mbajeni këtë në mendje, hapni zemrën dhe tregoni dashurinë, sepse kjo është mënyra më efikase për të marrë më shumë dashuri.
Përshtati për Tirana Today, Refxhei Tola
