Përfundon ndeshja e parë e fazës së 1/8 në “EURO 2020”. Danimarka ka mundur me rezultatin e thellë 4-0 Uellsin, duke siguruar kualifikimin në çerek-finale. Sfida u zhbllokua në minutën e 27 nga Dolberg.
Pas një aksioni mjaft të bukur, mesfushori goditi saktë, duke e dërguar topin në cepin e portës. 23-vjeçari ka tundur rrjetën me një goditje të bukur nga jashtë zone.
Me fillimin e pjesës së dytë, Danimarka gjeti sërish rrugën e rrjetës, pasi në minutën e 48-të, ishte përsëri Dolberg i cili shënoi një dopietë. Sulmuesi përfitoi nga një gabim i mbrojtjes uellsiane dhe dyfishoi shifrat.
Kur u duk se ndeshja po shkonte drejt fundit, danezët realizuan edhe dy herë të tjera. Në minutën e 88-të, ishte futbollisti i Atalantës Mahele, që trefishoi shifrat. Pas asistit të Jensen, 24-vjeçari lëvizi bukur brenda zonës, teksa me të majtën godti saktë duke çuar topin në rrjetë.
Në minutën e 94-të, shënoi Breithueit me një gjuajtje të bukur brenda zonës. Fillimisht goli u cilësua i parregullt, por më pas VAR-i e konfirmon si të rregullt.
Në çerek-finale, Danimarka do të ndeshet me fituesin e çiftit Holandë-Çeki, ndeshje e cila do të zhvillohet ditën e nesërme në orën 18:00, në “Pushkash Arena” të Hungarisë.
