Danimarka bën mrekullinë, kualifikohet në raundin e 1/8 me vetëm 3 pikë

Përfundojnë dy ndeshjet e grupit B. Danimarka ka shkatërruar Rusinë, duke e mundur me rezultatin e thellë 1-4, si edhe ka siguruar kualifikimin për turin e 1/8-ave. Një ndeshje mjaft e bukur dhe e luftuar nga të dyja skuadrat, teksa në minutën e 37 u zhbllokua edhe rezultati.

U desh një lëvizje klasi dhe goditje perfekte nga jashtë zone e Damsgaard, talenti i Serisë A dhe më i miri i Sampdorias sezonin e shkuar. Sulmuesi i krahut, pasi mori zotërimin e topit, depërtoi dhe më pas lëshoi një trajektore të paarritshme për portierin e Rusisë.

Në minutën e 59, Danimarka dyfishoi shifrat dhe këtë herë ishte dhurata e mbrojtësit kundërshtar. Zobnin, që ishte në kontroll të topit dhe totalisht i pashqetësuar ose pa presion nga kundërshtari, bëri një kthim prapa vrastar për Safonov.

Portieri nuk e arriti kurrë topin, pasi ai shkoi në trajektoren e Poulsen, që nuk fali dhe shënoi, duke dyfishuar rezultatin.

Rusia ka ngushtuar diferencën në minutën e 70 me Xhuba, që realizoi nga pika e bardhë e penalltisë. Një episod i diskutueshëm, por që u pa edhe nga arbitri në VAR dhe mori sinjalizim për ta dhënë 11-metërshin. Nga pika e bardhë, sulmuesi i Zenit nuk gaboi.

Në minutën e 79, Kristiansen realizoi golin e tretë, ndërsa 3 minuta më vonë, Mahle realizoi edhe golin e katërt.

Ndërkohë, ndeshja tjetër midis Finlandës dhe Belgjikës ka përfunduar me fitoren e belgëve, me rezultatin e pastër 0-2. Belgët, edhe pse të kualifikuar, dominuan takimin, teksa heroi i finlandezëve ishte portieri i tyre, që shpëtoi skuadrën skandinave në shumë raste.

VAR i anuloi një gol të Romelu Lukakut për pozicion jashtë loje. Por, megjithatë, Belgjika ka gjetur avantazhin me anë të një goditje me kokë nga Vermalen në minutën e 74, por portieri Hradecki ishte i pafat, pasi topi iu përplasnë trup, pasi kapi shtyllën.