Të dhëna të tjera tronditëse janë përcjellë nga gazetari i kronikës, Flamur Vezaj, në lidhje me arresimet e bujshme. Në një lidhje me skype nga SHBA për “360 Gradë”, në “Ora News”, ai zbuloi se është shoqëruar në polici motra dhe mbesa e ish-deputetit socialist, Arben Ndoka.
Po kështu ai shtoi se në grupin e trafikut të drogës në Shijak, janë të përfshirë edhe biznesmenë të fuqishëm në Tiranë. Gazetari nuk e ka lënë me kaq, por ka thënë se në ditët në vijim, pritet të publikohen faktet.
“Është shoqëruar edhe mbesa dhe e motra e z.Ndoka në drejtorinë e Policisë së Tiranës, dhe janë duke u marrë në pyetje. Nuk mund të quhet një grup i strukturuar kriminal. Vëllai i deputetit Arben Ndoka, është arrestuar si pjesë e grupit të Shijakut, për “trafikun e drogës”.
Tek rasti i “trafikut të drogës” në Shijak janë përfshirë biznesmenë të fuqishëm. Pronarë lokalesh të njohura nate në Tiranë, që prej vitesh merren me pastrim të parave. Në këtë dosje është përfshirë edhe Vangjush Dako. Z.Daku është kapur në përgjime, duke kërkuar vota dhe favore ndaj këtij grupi kriminal. Në ditët në vazhdim mund të publikohen edhe fakte”.
A kontrollohet prokuroria nga Rama? Pse Rama do të shkojë kaq afër, që një nga politikanët për të cilët ka investuar kaq shumë sa Dako në Durrës, ta çojë buzë përgjimeve dhe arrestit?
Gazetari tha gjatë emisionit se deri më tani janë ndërruar 5 prokurorë, dhe se emri i Dakos nuk do të dalë asnjëherë.
“Deri tani janë ndërruar 5 prokurorë për çështjen që janë arrestuar persona konkretë. Në raste të tjera, nuk janë ndryshuar prokurorë për dosjen konkrete. Dhe ai prokuror që e ka marrë, e ka çuar deri në fund.
Fakti që këtu janë ndryshuar 5 prokurorë, nuk besoj që përsëri z. Dako të ketë ndonjë përgjegjësi penale. Sepse nuk e mendoj që ndryshimet që janë bërë të prokurorëve, kam përshtypjen kanë arritur në një pikë që të mos dilte z. Dako. Po të dilte Dako, është një gjë shumë e rëndë, sepse provohet pretendimi i opozitës.
Nuk mendoj se do të nxjerrin Dakon. Apo do ta shesin, sepse fakti që janë ndryshuar 5 prokurorë, kam përshtypjen se është bërë një marrëveshje. Por nuk i shmanget dot faktit që këto përgjime në ditët në vazhdim mund të dalin e publikohen. Përgjimet janë të Prokurorisë së Krimeve të Rënda. Dhe informacion nga autoritetet gjermane. Autoritetet gjermane kanë sjellë letërporosi”.
