Çështja “Dritan Dajti”, ndër më të zvarriturat për shkak të kleçkave ligjore që gjente i pandehuri, sot mori zgjidhje. Gjykata e Apelit te Krimet e Rënda, rrëzoi dënimin me burgim të përjetshëm për Dritan Dajtin, i dënuar për vrasjen e katër efektivëve të policisë në Durrës. Dajti vrau katër efektivët e policisë, gjatë një aksioni për arrestimin e tij në gusht të vitit 2009 në Durrës.
Vendimi i dhënë ndaj tij duket se ka rebeluar gazetaren e kronikës Anila Hoxha. Ajo e nis shkrimin e saj në Facebook, me shpresën se një reagim do të vijë nga Ministri i Brendshëm, e jo vetëm. E indinjuar për vendimin në fjalë, Anila shfryn dufin ndaj kujdo që mban një post, dhe as që i bëhet vonë për jetën e një polici.
“Pres hakërrimin e Ministrit të Brendshëm. Pres hakërrimin e drejtorit të Përgjithshëm të Policisë së Shtetit !!! Jam kurioze sa trima janë, jam shumë kurioze sa do ta tregojnë shtetin sot!
Pres reagimin e dikujt. Të kujtdo dreqi që është ulur nëpër karrige shtetërore dhe as që i bëhet vonë se sa vlen jeta e një polici. Sepse jeta e një polici nuk vlen, përderisa i nxirrni nëpër aksione të tradhëtuara, i dekonspironi dhe i vrisni në mënyra gjithfarësh.
Disa i vrisni duke mos i motivuar. Disa i vrisni duke i pezulluar nga detyra, duke ju shkulur gradat nga gjoksi sa herë vini në pushtet. Disa i vrisni duke ju kërkuar llogari, pse nuk ju pershëndetën në menyrë ushtarake.
Disa i vrisni kur ju kërkoni pse nuk kanë bërë normën me gjoba. Disa i vrisni se nuk është as me atë, dhe as me këtë. Disa se i quani trupë dhe flotë kur ata jane efektivë të policisë.
Disa sepse punojnë për 50 mijë lekë rrogë, dhe i le makina në rrugë teksa ndjekin “cubin” e lagjes apo të qytetit. Disa vriten se ndaluan një deputet dhe befas ju vjen një telefonatë nga lart. Disa vriten pak nga pak. Disa vriten brenda një çasti. Dhe disa rivriten”.
RIP dëshmorët e atdheut!
FATOS XHANI
ALTIN DIZDARI
SAIMIR DUCKOLLARI
KASTERIOT FESKAJ
