Ndeshja mes Partizanit dhe Skënderbeut në “Selman Stermasi” u mbyll në barazimin e bardhë pa gola. Ishin të kuqtë që kërkuan më shumë rrugën e rrjetës, duke iu anuluar një gol me protagonist Prognin. Po ashtu Trashi dhe Sukaj falën Skënderbeun në dy raste të pastra që kishin për shënim. Pas ndeshjes tekniku IlirDaja u shpreh se nuk kishin ardhur për barazim në Tiranë, por për ta fituar ndeshjen, por mënyra si rrodhën ngjarjet ai rezultat ishte më i drejti. Skënderbeu kishte një mungesë të madhe si Vangjeli dhe ekipi ndjeu lodhje pasi ka zhvilluar shumë ndeshje këtë fillim sezoni, po ashtu edhe Lilaj nuk ishte në formën më të mirë pasi luajti me një dorë të fashuar.
“Skënderbeu nuk hyri në lojë për barazimin, ndonëse ky rezultat konsiderohet pozitiv. Jemi të kënaqur me rikthimet e Jashanicës dhe Nimagës. Mbase ndikoi mungesa e Vangjelit, për impulsin që ai servir, pa harruar që ai ka dhe eksperiencën e duhur. Barazimi ishte rezultati më i drejtë. Reagimi i skuadrës dhe forca e treguar edhe në pjesën e dytë tregon që jemi mirë. Pavarësisht lodhjes, të shfaqur në fillimin e takimit, me kalimin e minutave futbollistët kanë dalë në lojën e tyre. Duhet marrë në konsideratë fakti që luajtëm të enjten ndaj Dynamo Kyiv në UEFA Europa League. Sowe, Vangjeli dhe Shehi janë tre futbollistët që kanë më shumë minuta në këmbët e tyre, ndaj do të kishte qenë mirë të pushonte edhe Sowe. Do t’i uroj Partizanit që të ndryshoj, sepse me rikthimin e tij kampionati bëhet edhe më i bukur. Jo për justifikim, por gjendja e fushës nuk ofronte mundësinë që ne të dilnim plotësisht në lojën tonë”, deklaroi ndër të tjera trajneri i Skënderbeut, Ilir Daja.
Nga ana tjetër Dalipi që qëndroi në stolin e Partizanit, në mungesë të Starovës është shprehur se ekipit të tij i është mohuar fitorja në këtë sfidë. Ishte një rast që në minutën e katërt, ku Progni dërgon topin në rrjetë nga një pozicion i dyshimtë. Ndërsa në fundin e takimit është Hasani që rrëzohet në zonë dhe Dalipi e vlerëson si penallti të paakorduar për të kuqtë.
“E dinim që ishte një ndeshje e vështirë, por kishim pritshmëri maksimale. Mund të shënonim po të kishim patur pak më shumë qetësi, apo edhe sikur të kishim patur më shumë fat. I tillë ishte rasti i Sukaj. Mund të jetë krijuar iluzioni sikur kemi ndërtuar një ekip mbrojtës, por nuk është e vërtetë, përkundrazi, me 4-4-2 i dhamë më shumë mundësi sulmi. Në një farë mënyre u realizua, por sot ishim të pafat. Për episodin e golit të anuluar shihet edhe nga pamjet filmike që goli nuk ishte në pozicion jashtë loje, ndërsa kam dyshime edhe për momentin e rrëzimit të Hasanit në zonën Skënderbeut. Për mendimin tim ishte penallti”, deklaroi Dalipi.
