Tekniku Ilir Daja pas ndeshjes është shfryrë ndaj arbitrit për atë gol të shënuar në minutën e fundit. Ai fajëson atë se i ka masakruar, duke u mohuar edhe një penallti. Por Skënderbeu në këtë sfidë vinte me disa mungesa mjaft të rëndësishme dhe kjo bëri që të mos kishte asnjë sulmues në dispozicion.
“Europa na do kaq shumë, saqë problemi fillon që tek mosdhënia e vizave. Sot nuk kishim asnjë sulmues. Soue i dëmtuar dhe Xhejms nuk mori vizë, nuk kishim asnjë sulmues sot. Në minutën e 74-t patëm një rast për penallti, por arbitri na kërcënon se do hapë raport pas ndeshjes. Normale që na vjen keq kur gjërat shkojnë kështu, pasi kemi filluar një punë që nga fillimi i qershorit. Do dëshironim ta mbyllnim në vendin e tretë. Por nuk kemi çfarë bëjmë, me këtë pasaportën tonë, edhe oficerët e Uefas janë shumë dashamirës.”
Skënderbeu me rezerva?
“Përveçse ishim të kushtëzuar nga mungesat, në fund të fundit pas 2 ditësh shkojmë në Laç, dhe nuk mund të përdorim të gjithë kontingjentin, për një ndeshje që nuk kishte kaq shumë rëndësi. Tashmë objektivi ynë është fitimi i kampionatit.”
Arbitri?
“Nuk ishte nervozizëm i lojtarëve apo stafit, por nervozizëm nga ana e arbitrit. I thashë që çdo njeri ka hapësirën e vet, dhe nuk mund të më vijë mua 5cm larg, të më flasë.”
Sulmi?
“Demte?Kur një lojtar e lëviz nga pozicioni natyral, edhe kur bën gabime është i justifikuar. Nuk mund t’i kërkoj më shumë, por në fund nuk është pozicioni i tij. Harxhoi shumë energji pasi lëvizi shumë në sulm, për të kompensuar mungesat që kishim. Jam i kënaqur, pasi Gavazaj është rikthyer në rolin e sulmuesit anësor, një forcë e rëndësishme për ne. Soue përveçse ka shënuar, ka shërbyer edhe të tjerët për të shënuar, dhe është një pikë e fortë për të hapur zonat. Xhejmsi pavarësisht se nuk është në pozicionin natyral, i bën mirë sulmit tonë, edhe kur jemi duke mbrojtur.”
