Ministri i Punëve të Jashtme i Serbisë Ivica Daçiç pretendon se edhe pesë shtete të tjera do ta tërheqin njohjen për pavarësinë e Republikës së Kosovës deri në fund të këtij viti, raporton “Gazeta Express”.
“Presidenti dhe unë kemi pasur takime me më shumë se 92 përfaqësues të shteteve dhe me më shumë se 20 përfaqësues të organizatave ndërkombëtare e rajonale. Kemi pasur mesatarisht 25-30 takime në ditë”, ka thënë Daçiç.
Kreu i diplomacisë serbe ka përmendur takimet me Trump-in, Macron-in dhe ministrin e Punëve të Jashtme të Rusisë, Sergei Lavrov.
Gjithashtu edhe takimet me Përfaqësuesin e SHBA-së për Ballkanin Perëndimor Matthew Palmer dhe zyrtarin e lartë amerikan, Philip Reeker: “Një prej synimeve tona ishte që të flisnim me shtetet edhe për njohjen e Kosovës, që të rimendojnë vendimet e tyre. Unë mund të them se deri në fund të vitit së paku pesë shtete do të suspendojnë njohjen për Kosovën”.
