Teknologjia në futboll sa vjen dhe po perfeksionohet. Duke lënë pas gabimet e së shkuarës, VAR është bërë mjaft i rëndësishëm, duke u ardhur në ndihmë arbitrave për të marrë vendimet e duhura. Një ngjarje mjaft interesante është regjistruar edhe dje në kampionatin polak, në sfidën mes Legias së Varshavës, përballë Cracovias.
Bëhet fjalë për mbrojtësin e Legias, William Remy, i cili u ndëshkua dy herë me karton të kuq, pikërisht falë ndihmës që VAR i dha arbitrit kryesor, për të korrigjuar vendimin e mëparshëm.
Ka qenë minuta e 75-të e takimit, kur mbrojtësi kreu një ndërhyrje të rëndë ndaj kundërshtarit, duke e shkelur qëllimisht mbi kofshë, por në lojë e sipër, arbitri akordoi vetëm karton të verdhë, që ishte i dyti për Remy dhe normalisht mbrojtësi u largua me karton të kuq për në dhomat e zhveshjes.
There's a hand signal for rescinding a yellow card now. Thank you VAR, we are living in blessed times.pic.twitter.com/nGZYctP4WJ
— MUNDIAL (@MundialMag) February 18, 2019
Por ndërkohë arbitri u sinjalizua që të rishikojë vendimin nëpërmjet VAR-it dhe vetëm pasi shkoi para monitorëve, kuptoi se ndërhyrja ishte vërtetë e ashpër dhe meritonte dënim direkt me karton të kuq.
Arbitri riktheu Remy në fushë, duke i sinjalizuar fillimisht se kartoni i verdhë ishte hequr, ndërsa mbrojtësi nga entuziazmi vrapoi për t’u rikthyer në fushë, por në moment pa edhe kartonin e kuq para syve, duke mbetur vërtetë i habitur.
