Me gjasë, izolimi në Itali mund të zgjatet deri më 16 maj. Sipas ekspertëve, këto janë ditë vendimtare për të kuptuar ecurinë e kurbës së pandemisë nga COVID-19 në Itali.
Kreu i Mbrojtjes Civile, Angelo Borrelli, ripërsëriti thirrjen ndaj qytetarëve për të mos braktisur masat e kontrollit dhe izolimit. Duke parë gjendjen kritike, ai parashikoi se këto masa mund të zgjaten deri më 16 maj.
“Deri në 16 maj mund të kemi të dhëna të mëtejshme pozitive që na këshillojnë të rifillojmë aktivitetet dhe të fillojmë fazën 2. Situata aktuale na lejon të marrim frymë, veçanërisht përsa i përket ambienteve spitalore dhe kujdesit intensiv që po lehtësohet nga presioni”.
Në mbarë botën janë prekur mbi 200 shtete. Shtetet më të prekura janë Italia me mbi 13 mijë të vdekur, Spanja renditet e dyta me më shumë se 10 mijë viktima si edhe Shtetet e Bashkuara të Amerikës ku janë regjistruar më shumë se 200 mijë të infektuar dhe mbi 5 mijë të vdekur.
Vendet më të fuqishme në botë duket se kanë humbur këtë betejë të ashpër, teksa është e vështirë të vrasësh një armik që është i padukshëm.
