Një raport i inteligjencës amerikane zbuloi se tre studiues në Institutin e Virologjisë Wuhan të Kinës u sëmurën në nëntor 2019 dhe kërkuan të shtroheshin në spital, një zbulim i ri i cili mund të nxisë debate të mëtejshme në lidhje me origjinën e pandemisë së koronavirusit.
Bazuar në faktet e dhëna nga administrata Trump, thuhej se studiuesit ishin sëmurë në vjeshtë të vitit 2019 por nuk shkuan aq larg sa të thanë se ishin shtruar në spital.
Nga ana tjetër, Kina raportoi tek Organizata Botërore e Shëndetësisë se pacienti i parë me simptoma të ngjashme me Covid u regjistrua në Wuhan më 8 dhjetor 2019, që bie ndesh me faktet, shkruan CNN.
Inteligjenca amerikane ende nuk e di se me çfarë ishin të sëmurë studiuesit dhe vazhdon të ketë besim të ulët në përfundimet e nxjerra për origjinën e saktë të virusit, përtej faktit se ai erdhi nga Kina.
Zbulimi i numrit të studiuesve të infektuar, koha e sëmundjes të tyre dhe vizitat që ata bënë në spital vijnë në prag të një takimi të organit vendimmarrës të Organizatës Botërore të Shëndetësisë, i cili pritet të diskutojë fazën tjetër të një hetimi mbi origjinën e Covid-19.
Drejtori i Laboratorit Kombëtar të Biosigurisë Wuhan, i cili është pjesë e Institutit të Virologjisë Wuhan, mohoi kategorisht raportin.
