Ministrja e Infrastrukturës dhe Energjetikës Belinda Balluku ka dalë ditën e sotme në një konferencë shtypi. Gjatë fjalës së saj ajo theksoi se qeveria i ka shpallur luftë frontale informalitetit, për të garantuar kështu cilësinë e karburanteve.
“Qeveria ka nisur fushatë kundër informalitetit. Kemi shpallur luftë frontale kundër informalitetit. Shqetësuese ngelet mungesa e kapaciteteve monitoruese.
Në muajt në vazhdim, inspektorati do të pësojë një rikonstruktim të ri, dhe ngritje të kapaciteteve. Brenda muajit tetor ne do të ngremë laboratorin e ri të hidrokarbureve, duke ulur kostot, si të njësisë së inspektoratit, por edhe subjekteve.
Informalitetin e kemi dhe tek subjektet e mëdha, përpunuese dhe tregtuese. Nuk bëjmë dallime mes subjekteve. Por nuk jemi këtu të japim fletërrufe. Masat do të jenë shumë të forta. Insistoj dhe dua ta them një nga kriteret kryesore ndaj informalitetit. Kriteri është se nuk do të bëjë dallim apo diferencë për asnjë nga emrat apo subjekte. Ajo çka kemi në interes është që të ofrojmë siguri. Subjektet duhet të reformohen”, pohoi ministrja.
