UEFA Champions League, kompeticioni më i madh i futbollit për klube në kontinent, starton mbrëmjen e sotme me disa sfida të mëdha. Ky sezon vjen me disa ndryshime të cilat bien në sy, pasi dy ndeshje do të zhvillohen në orën18:55 dhe gjashtë të tjerat në 21:00.
Do të jenë dy përballjet e grupit B që do të hapin siparin e këtij edicioni, me dy ndeshje mjaft të bukura si Inter-Tottenham dhe Barcelona-PSV. Spanjollët duket favoritë në këtë sfidë në letër, por duke parë holandezët se çfarë janë duke bërë në kampionatin e tyre pritet që të jetë një sfidë e zjarrtë.
Ndërsa Interi është duke përjetuar një rikthim pas 6 vitesh mungesë dhe në “San Siro” e pret një ndeshje mjaft delikate. Pavarësisht se asnjëra nga skuadrat nuk vjen në formën më të mirë në këtë sfidë e shkuara të bën të besosh se do të dhurojë spektakël. Gjithçka është e barabartë mes klubeve, janë përballur 4 herë dhe të dy skuadrat kanë marrë nga dy fitore.
Në orën 21:00 sytë e të gjithëve do të jenë në “Anfield Road”, aty ku Liverpooli pret Paris Saint Germain në duelin për kreun e Grupit C. Napoli sfidon Crvena Zvezdën në Beograd, për ta nisur me këmbën e mbarë dhe pse jo për të vendosur në vështirësi “The Reds” dhe parizienët.
Në Grupin A, Atletico e Madridit e nis përballë Monacos, që ka humbur disa lojtarë të rëndësishëm në merkato dhe ka një “mal” me mungesa, megjithëse edhe spanjollët nuk po kalojnë një moment të mirë. Takimi tjetër i këtij grupi është Club Brugge-Dortmund. Në grupin D vëmendje merr sfida mes Schalke 04 dhe Portos, ndërsa Galatasaray pret në Stamboll Lokomotivën e Moskës.
