19:00 Teuta-Sherif Tiraspol (Moldavi)
Sot, në orën 19:00 nis rrugëtimi europian i Teutës së Durrësit. Blutë, kampionë të Shqipërisë presin në Durrës Sherifin e Tiraspolit nga Moldavia, në ndeshjen e parë të raundit të parë paraeliminator të Champions League-s 2021-2022. Për herë të parë në histori kjo skuadër luan në kompeticionin më të rëndësishëm për klube në botën e futbollit.
Sherifi i Tiraspolit kuotohet favorit nga kompanitë e basteve si dhe nga ekspertët e futbollit, por Teuta është përforcuar ndjeshëm për “Kupat e Europës”; mjafton të përmendet fakti që ka afruar në formë huazimi dy futbollistë të kombëtares. Taulant Seferi i Tiranës dhe Sherif Kallaku priten madje titullarë që sonte.
Teuta u eliminua vjet nga Europa League pasi humbi në ndeshje teke, në Durrës, përballë Granadës, skuadrës spanjolle që i hapi më pas probleme në kampionat dhe Barcelonës, Realit dhe Atletikos.
Këtë vit pritet më shumë nga Teuta pasi vjen me stofin e kampiones kombëtare dhe ka një short më të favorshëm se vjet, pavarësisht se Sherifi ka rezultuar një skuadër e pakalueshme për shqiptarët ndër vite.
Kush janë ata?
Sherif Tiraspoli është 19 herë kampion i Moldavisë si dhe ka fituar 10 herë Kupën e Moldavisë. Ata kanë në përbërje 10 lojtarë të kombëtares moldave. Vlera e skuadrës Moldave shkon pak mbi 10 milion euro.
Në vitin 2011 Dinamo e Tiranës i mundi moldavët 1-0 në shtëpi por humbi 3-1 atje. Në 2017, Sherifi mposhti në ndeshjen e parë Kukësin 1-0 në Moldavi në ndeshjen e parë, ndërsa në ndeshjen e kthimit kuksianët triumfuan 2-1. Në 2019-ën radhën e kishte Partizani që në raundin e dytë paraeliminator të Europa League-s u mund 0-1 në Tiranë dhe barazoi 1-1 në Moldavi.
Në prag të ndeshjes me Sheriff Tiraspol, trajneri i Teutës , Edi Martini dhe kapiteni Renato Arapi, kanë dalë ditën e sotme në një konferencë zyrtare për mediat ku kanë kanë folur për sfidën e UEFA Champions League.
