Krahas Champions League dhe Europa League tashmë mund të kemi edhe një kompeticion të tretë europian. Këtë ide e ka hedhur shoqata e klubeve europiane e njohur si ECA e themeluar në 2008-ën si strukturë e UEFA-s e që numëron 220 klube anëtare. Në një konferencë për shtyp ditën e sotme është shfaqur presidenti i Juventusit, Andrea Agnelli i cili është shprehur se shoqata e klubeve e ka miratuar krijimin e këtij kompeticioni dhe tashmë pritet vetëm drita jeshile nga UEFA. Një risi që mund të konkretizohet në vitin 2021.
“Në pritje të aprovimit nga UEFA klubet kanë gjetur marrëveshjen për t’i dhënë jetë Kupës së tretë Europiane duke nisur nga sezoni 2021-2022. Në këtë mënyrë shpjegon Agnelli, hapet loja edhe për ekipe të tjera pasi numri i skuadrave pjesëmarrëse në kompeticionet Europiane do të shkojë në 96 të tilla”.
Sipas “Sport Bild”, ky komepticion i ri europian do të zvogëlojë numrin e klubeve nga kontinenti ynë, që marrin pjesë në “Europa League”. Pra, nuk do të preket Champions-i. Ky reduktim do të ndodhë nga 48 deri në 32 ekipe, duke pasur të njëjtin numër si në Ligën e Kampionëve.
Ky kompeticion i tretë, për të cilin ende janë në kërkim të emrit, do të ketë përbërjen e 32 ekipeve nga një total prej 96 ekipesh europiane, që marrin pjesë në garat kontinentale. Edhe pse detaje të mëtejshme mbi sistemin e vlerësimit për këtë kompeticion të tretë europian për klubet janë të panjohura, duket se në parim është rënë dakord që në sezonin 2021-2022 te kemi një garë të trefishtë të UEFA-s.
Për një propozim të tillë është folur prej disa kohësh por tashmë vjen konfirmimi i parë i artikuluar. Një mundësi e mirë kjo edhe për skuadrat shqiptare, që ne këtë mënyrë do të kenë më shumë hapësira përfaqësimi në Europë, duke përfituar edhe te ardhura financiare tejet të rëndësishme për të rritur ambiciet dhe projektet respektive.
Njëherazi Agnelli shpjegoi se duke nisur nga viti 2024 do të ketë ndryshime edhe në kalendarin e garave europaine, i cili do të rishikohet për të sjellë lehtësira.
