Kryetari i Komisionit Qendror të Zgjedhjeve, Denar Biba i kërkon ndihmë kryeprokurorit Adriatik Llalla që të ndërhyjë për të mos u bllokuar procesi zgjedhor në zgjedhjet e pjesshme të 7 majit në Kavajë.
Në këtë letër ngrihet shqetësimi se PD-ja mund të bllokojë procesin zgjedhor në Kavajë përmes tubimeve.
Shqetësimi i kreut të KQZ-së vjen pas informacioneve të dhëna nga Drejtori i Përgjithshëm i Policisë, Haki Çako, më 28 prill.
Informacionet konsistojnë në bllokimin e procesit të votimit duke filluar me KZAZ-n numër 42 përmes zhvillimit të tubimeve dhe grumbullimeve të simpatizantëve të Partisë Demokratike.
Fragmet nga letra e KQZ-së
“Biba: Me shkresën nr. 589 date 28.04.2017 të Drejtorit të Përgjithshëm të Policisë së Shtetit vihemi në dijeni të administrimit te disa informacioneve që kanë të bëjnë me zhvillimin e tubimeve grumbullimeve, protestave nga simpatizantët e Partisë Demokratike dhe bllokimin e KZAZ nr 42, për administrimin e procesit zgjedhor në datat, 6 dhe 7 maj 2017”.
Më tej kreu i KQZ-së thotë se e drejta e tubimit është një e drejtë kushtetuese, por shpreh shqetësimin se në këtë rast bie ndesh me të drejtën e votës.
