Në orën 18:30, kryetari i Partisë Demokratike Lulzim Basha do të zhvillojë një takim me drejtuesit e qarqeve.
Nuk dihet ende çfarë do të diskutohet në selinë e PD, por numërimi i kutive të votimit është drejt fundit dhe rezultatet e deritanishme nxjerrin fituese Partinë Socialiste.
Që prej ditës së djeshme, Basha nuk ka dalë në media, teksa kanë filluar edhe lëvizjet e para brenda partisë kundër tij, pasi anëtari i Kryesisë, Fatbardh Kadilli kërkoi dorëheqjen e tij, si përgjegjës kryesor për humbjen.
Ndërkohë, mësohet se Basha ka nisur një sërë takimesh të njëpasnjëshme në selinë blu. Ai ka pritur fillimisht koordinatorin e drejtuesve politik në qarqe, Eduard Halimin, koordinatorin e fushatës, Alfred Rushajn, drejtuesin politik të Elbasanit njëherzi Sekretarin e Përgjithshëm të PD-së, Gazment Bardhin.
Në seli kanë mbërritur edhe aleatët e tij të vegjël, njëri pas tjetrit nga kreu i PDIU-së, Shpëtim Idrizi si edhe kreu i PR-së, Fatmir Mediu.
