E argumentuar në 140 faqe, Gjykata e Shkallës së parë të Krimeve të Rënda ka zbardhur sot vendimin për ish-ministrin e Brendshëm, Saimir Tahiri.
Tre gjyqtarëve Flora Hajredinaj, Ardit Mustafaj dhe Irena Gjoka, u janë dashur 49 ditë për të dorëzuar të plotë vendimin. Në përmbajtje sqarohet dënimi dhe arsyetimi pse gjyqtarët vendosën për 3 vite shërbim prove dhe 3 vite pa të drejtë për të ushtruar funksione publike.
Në vendim sqarohet dhe arsyeja përse ranë akuzat për trafik droge në bashkëpunim dhe grup të strukturuar kriminal.
Më 19 shtator Gjykata e Krimeve të Rënda dha dënimin për ish–ministrin e Brendshëm, Saimir Tahirin me 5 vite burg. Për shkak se ish-ministri përfiton gjykim të shkurtuar dhe rrjedhimisht përfiton ulje të 1/3 së dënimit, vitet e burgut do të konvertohen në 3 vite shërbim prove.
Nga ana tjetër, PD e quajti këtë vendim të turpshëm.
Ish-ministri Tahiri kërkoi pafajësinë duke ankimuar vendimin e Gjykatës. Gjithashtu edhe Prokuroria ka ankimuar në Gjykatën e Apelit të Krimeve të Rënda vendimin për dënimin me 3.4 vite shërbim prove.
