Ministrja e Punëve të Jashtme, Olta Xhaçka, ka zbardhur diskutimet që ka zhvilluar me homologun grek gjatë vizitës së tij në Tiranë. Në një konference të përbashkët me kryediplomatin e jashtëm grek, Nikos Dendias, Ministrja e Jashtme, Olta Xhaçka, tha se gjatë takimit është diskutuar edhe për çështjen e ligjit te luftës, si edhe për çështjen e pronave çame. Xhaçka tha se ekziston vullneti i mirë për të dhënë zgjidhje. Tirana zyrtare dhe Athina kanë vendosur që çështjen e delimitetit të hapësirës detare ta çojnë në Hagë. Diplomati i lartë grek u shpreh se të gjitha diferencat mes dy vendeve, kryesisht për cështjen e detit do të zgjidhen në gjykatën ndërkombëtare. Ministri grek tha se shumë shpejt do të nisin procedurat për abrogimin e ligjit të luftës dhe diskutimet për pensionet e shqiptarëve.
“Kryeministrit Edi Rama do t’i përcjell edhe përshëndetjet e kryeministrit grek. Unë kam gëzim që jam këtu dhe të njoftoj së bashku me kryeministrin Rama vendimin tonë për përcjelljen e çështjes së delimitetit të hapësirave detare në Hagë.
Përmbushja e kësaj procedure ka rëndësi të veçantë. Të dyja vendet dëshirojnë që të zgjidhim diferenca tona, kryesisht atë të detit. Mendoj se përtej rëndësisë që ka për vendet tona, dërgon edhe një mesazh të rëndësishëm se kjo është mënyrë e saktë për të zgjidhur divergjencat tona.
Ne duhet të depozitojmë sa më shpejt dokumentet në gjykatën e Hagës. Marrëdhëniet tona janë zhvilluar mirë, madje abrogimi i ligjit të luftës është dicka që ne duhet të shkëputemi. Abrogimi i ligjit duhet të mbyllet sa më shpejt. Ne duhet të diskutojmë mbi çështjet praktike”, tha Dendias.
E të njëjtit mendim ishte edhe Ministrja e Jashtme e Shqipërisë, Olta Xhacka, e cila u shpreh se kanë vullnetin për të gjetur kompromis në një palë të tretë, siç është ajo e Gjykatës Ndërkombëtare të Drejtësisë.
“Një tjetër çështje e diskutuar është edhe ajo e delimitimit të zonave detare, e cila paraqet interes të vecantë për dy vendet tona, se lidhet me ushtrimin e sovranitetit territorial dhe të drejtat sovrane në hapësirat detare respektive.
Rikonfirmuam dhe një herë vullnetin tonë për kërkimin e një kompromisi, për të referuar çështjen e një pale të tretë gjyqësore, siç është Gjykata Ndërkombëtare e Drejtësisë. Ne besojmë e shpresojmë që konstruktiviteti dhe vullneti i mirë për të kërkuar një zgjidhje të pranuar reciprokisht në një çështje kaq të vështire sa ajo e hapësirave detare, mund të shërbejë dhe si një shembull i qasjes konstruktive me të cilën vendet tona mike mund të nisin diskutimet dhe për çështje të tjera sado të vështira që kemi trashëguar nga historia e periudha tragjike e luftës botërore, si nevoja abrogimi për ligjin e luftës e çështje për të drejtat e pronësisë”, tha Xhaçka.
