Kryeministri Edi Rama po mban një konferencë për shtyp me gazetarët në kuadër të mbylljes së vitit.
Fillimisht, Rama bëri bilancin, ku tregoi sipas tij 10 nga arritjet e qeverisë në 100 ditëshin e parë.
Ndër çështjet që ai përmendi ishin: reforma në drejtësi, ulja e numrit të vrasjeve, përshkallëzimi diplomatik për hapjen e negociatave, përballimi i fatkeqësisë natyrore, operacioni për pastrimin e Shqipërisë, reduktimi i dokumenteve të kërkuara, rritja e sigurisë ushqimore, akreditimi i universiteteve, pastrimi i akseve kombëtare dhe miratimi i buxhetit 2018, shkruan Tirana Today.
Teksa komentoi secilën prej këtyre çështjeve, Rama kritikoi PD-në për mospërfshirjen në çështjen e integrimit të Shqipërisë në BE, duke shprehur keqardhjen për mosunifikimin në këtë çështje me rëndësi kombëtare.
FJALA E RAMËS:
Reforma në Drejtësi ka përparuar. Zgjedhja e prokurores së Përgjithshme është bërë, duke garantuar vazhdimësinë e reformës, e cila nuk mund të merret peng për agjenda politike.
Procesi ka hyrë në një fazë të re zbatimi dhe paralelisht me Vettingun do të kemi ngritjen e institucioneve të reja të sistemit të reformuar të drejtësisë.
Së dyti do të doja të ndalesha në faktin se ky vit shënon shifrën më të ulët historike të vrasjeve dhe shënon vitin e kthesës historike në raport me fenomenin e kultivimit të kanabisit. Është viti që e nxjerr Shqipërinë nga harta e vendeve që kultivojnë lëndë narkotike.
Së treti, në këto 100 ditë të para ne kemi përshkallëzuar atë që do ta quaja një aksion në shkallë të gjerë diplomatik për të siguruar hapjen e negociatave për anëtarësim në 6 mujorin e ardhshëm dhe do vijojmë ta bëjmë intensivisht edhe pas vitit të ri. Keqardhje që nuk jemi të gjithë bashkë të unifikuar, për çeljen e negociatave. Kemi një situatë ku opozita po luan me zjarrin duke u kthyer në pengesë për të përcjellë mesazh të unifikuar të politikës shqiptare lidhur me këtë element kyç. Negociatat çelen për Shqipërinë dhe me Shqipërinë, nuk zgjasin sa një mandat qeverisës.
Së katërti, kaluam një moment shumë të vështirë për shkak të fatkeqësisë natyrore dhe jam shumë krenar që qeveria ishte në krye të detyrës dhe forcat e ndërhyrjes së shpejtë u treguan në një lartësi që meriton të gjithë mirënjohjen dhe respektin tonë. Edhe sot vazhdojmë procesin e riparimit të zonave të prekura nga uji dhe po punojmë për një plan afatgjatë me investime qysh në vitin e ardhshëm për të adresuar të gjitha ato pika të dobëta.
Së pesti ka nisur dhe vazhdon një operacion për të pastruar Shqipërinë, janë bërë disa hapa. Operacioni do të synojë intensifikimin e pjesëmarrjes së komuniteteve në këtë proces duke synuar që në sezonin tjetër të kemi një Shqipëri më të pastër.
Së gjashti, kemi ecur me reduktimin e lejeve të licencave të autorizimit të dokumentave. Vazhdon përfshirja e shumë shërbimeve online në portalin e-albania, reduktimi i dokumenteve do lehtësoje qytetarët dhe bizneset dhe do reduktojë korrupsionin, ryshfetin apo bakshishin.
Së shtati, kemi nisur të adresojmë me shumë këmbëngulje çështjen e sigurisë ushqimore, me mbylljen e subjekteve të mishit, apo thertoreve që nuk përmbushnin kushtet.
Së teti ka përfunduar procesi i akreditimit përfundimtar të universiteteve. Agjencia britanike e akredimit ka përfunduar raportet, që janë publike në faqen zyrtare të ministrisë së Arsimit dhe Sportit.
Së nënti, kemi kryer një operacion të rëndësishëm për të pastruar akset kombëtare dhe për të larguar prej tyre mijëra tabela dhe plot sheshpushime të mbushura me mallra dhe hekurishte që përbënin një kërcënim mjedisor dhe për jetën e njerëzve.
Dhe së fundmi kemi miratuar buxhetin e vitit 2018 që është një pasqyrë e qartë me ecuri pozitive të vendit dhe e ambicies për të bërë shumë më tepër, pasi kjo që është bërë nuk mjafton. TIRANA TODAY
