Bashkia e Krujës ka çelur sezonin turistik në Krujë për vitin 2017. E pranishme në aktivitetin e organizuar nga Bashkia në bashkëpunim me Fondin Shqiptaro – Amerikan për Zhvillim ka qenë edhe ministrja e Zhvillimit Urban, Eglantina Gjermeni.
Kjo e fundit ka zbuluar shifrën marramendëse të investimeve në qytetin e Krujës, i cili mbetet një nga qytetet më të vizitueshme të Shqipërisë në çdo stinë të vitit.
“6 miliard lekë janë investuar gjatë këtij mandati në Krujë, në infrastrukturë rrugore si: Rruga e Malit apo rruga e Kalasë, ndërhyrje të kujdesshme në zonën e pazarit pa cenuar origjinalitetin, apo edhe grantet e dhëna për fuqizimin e artizanatit në mënyrë që tradita e prodhimeve artizanale dhe mbi të gjitha autoktone të Krujës të marrë vlerën e duhur. Dy projektet e tjera që po zbatohen janë rikualifikimi i qendrës së Krujës dhe ndërtimi i parkimit nëntokësor si dhe rikualifikimi i sheshit Mustafa Mërlika”, tha Ministrja Gjermeni në fjalën e saj.
