Komiteti Këshillues në Qendrat Amerikane për Kontrollin dhe Parandalimin e Sëmundjeve (CDC), paralajmëroi se ekziston një lidhje e mundshme mes dy vaksinave kundër COVID-19-s dhe një efekti të rrallë anësor në zemër që përjetojnë meshkujt, kryesisht ata në moshë të re.
Raportet e vëzhguara të miokarditit dhe perikarditit janë më të larta se numri i rasteve të pritura në moshat 16-24 vjeç pas dozës së dytë të vaksinës. Miokarditi është inflamacion i muskujve të zemrës, sipas CDC, dhe perikarditi është inflamacion i rreshtimit të jashtëm të zemrës, shkruan US News.
Më shumë se 1,200 persona që kanë marrë vaksinën e Pfizerit apo Modernës zhvilluan miokardi, apo inflamacion të muskujve të zemrës. Efektet ishin më të spikatura tek meshkujt sesa femrat dhe ato u vunë re më shumë pas marrjes së dozës së dytë.
CDC së bashku me grupet e shëndetit publik dhe agjencitë e tjera federale lëshuan një deklaratë të Mërkurën duke adresuar raste të rralla të problemeve të zemrës dhe miratuar vaksinat COVID-19.
“Faktet janë të qarta: ky është një efekt anësor jashtëzakonisht i rrallë, dhe vetëm një numër jashtëzakonisht i vogël i njerëzve do ta përjetojnë atë pas vaksinimit. E rëndësishmja, për të rinjtë që e bëjnë këtë, shumica e rasteve janë të lehta dhe individët shërohen shpesh vetë ose me trajtim minimal. Përveç kësaj, ne e dimë që miokarditi dhe perikarditi janë shumë më të zakonshëm nëse keni COVID-19 dhe rreziqet në zemër nga infeksioni COVID-19 mund të jenë më të rënda “, thanë agjencitë dhe grupet në një deklaratë .
