Ministri i Punëve të Jashtme, Ditmir Bushati tha sonte se brenda pranverës Greqia të shfuqizojë “Ligjin e Luftës”. I ftuar i ftuar në emisionin “5 pyetjet nga Babaramo” në Report Tv, Bushati u shpreh se shfuqizimi i këtij ligji do bëjë të mundur që qytetarëve shqiptarë të cilëve u janë sekuestruar pronat në Greqi, t’u kthehen këto prona.
“Vizita e kryeministrit të Greqisë në Shqipëri do ketë produkte konkrete dhe do të pasohet me vizita të tjera në Greqi dhe takime të përbashkëta.
Ka çështje që duhet të zgjidhen në mënyrë të njëanshme. P.sh, shfuqizimi i Ligjit të Luftës dhe pasojave të tij është një akt i njëanshëm. Pala ka mohuar ekzistencën për një kohë të gjatë.
Kam dëgjuar interpretime të ndryshme edhe këtu në Shqipëri lidhur me traktatin e miqësisë që sipas tyre paska ezauruar ligjin e luftës, por tashmë s’ka dyshime as për palën greke se ky ligj ekziston, ka pasoja për pronat atje si pasojë e këtij ligji. Shpresojmë që ky ligj do të shfuqizohet në mënyrë që shtetasit shqiptarë që kanë prona në sekuestro, të gëzojnë këto prona“, u shpreh Bushati.
