Analisti Andi Bushati, i ftuar në emisionin “Të Paekspozuarit”, ku u publikua një transkripit i bisedës së Vangjush Dakos me një prej anëtarëve të bandës Avdyli, u shpreh se sot publiku e ka të qartë se Dako komunikon me anëtarët e bandës dhe se ai është pjesë e përgjimeve në dosjen 339.
“Ne sot kemi një lajm. Ka pasur një debat publik për 2 vjet me radhë. Njëra palë thoshte në përgjime gjermane dhe shqiptare, me bandën del i lidhur Dako. Dako shkoi në gjyq dhe tha do çoj Bashën në gjyq,
Me këto dokumente kemi lajmin e parë. Vangjush Dako, komunikon me pjesëtarët e prezumuar të bandës.
Lajmi i dytë, Vangjush Dako rezulton në përgjimet e të akuzuarve, si anëtar të një bande kriminale që bënte trafik, si një njeri që përmendet për të folur për zgjedhjet. Po të shohësh datat e dokumenteve që kemi në dispozicion, janë 24 dhe 27 qershor.
Në 24 qershor, flitet çfarë do bëjmë për të paguar njerëzit për zgjedhje. Dhe në 27 flitet cfarë do bëjmë për ti falënderuar njerëzit
A mund të bërtasim siç bërtet opozita, që Dako duhet të shkojë në burg? Absolutisht jo. Por, që kur prokurorinë e ka marrë në dorë Arta Marku, po na ndodh një gjë, çështjet që prekin pushtetin, arkivohen. Edhe në këtë dosje, sa ka dalë Vangjush Dako, është hapur ajo 339 dhe pastaj 339/1. Njëlloj si me vëllain e ministrit të brendshëm. Dosjet e njerëzve që prekin pushtetin, arkivohen.”
Ndërsa analisti Fatos Lubonja, tha se ajo që del nga përgjimet, është “e sigurt në këtë dosje na del konfidenca e madhe e kryetarit të bashkisë Durrës me njerëz të një bande kriminale”.
“Ka një konfidencë saqë është ky që falënderon ata. Në Shqipëri jemi mësuar që i vogli ka më shumë mundësi të falënderojë të madhin se i bën nderin”, tha Lubonja.
“Në aspektin ligjor, prokuroria që e ka dokumentin që mesa shoh është i 2017-ës duhet të kishte hetuar”, shtoi analisti.
Nga përgjimet del se, Vangjush Dako komunikon me Altin Avdylin, alias “Niçe” dhe i kërkon atij takim me Astrit Avdylin, kreun e grupit të Shijakut, për ta falënderuar. Bisedë e regjistruar pak pas zgjedhjeve të 2017-ës. Sipas Lubonjës, kryebashkiaku donte ta falënderonte për kontribut në blerjen e votave.
