Ministri për Evropën dhe Punët e Jashtme, Ditmir Bushati i është përgjigjur Athinës zyrtare pas “sulmit” diplomatik të një dite më parë.
Bushati tha se mbetet i hapur për studimin e çdo lloj modeli për pakicat, përfshirë modelin grek:
“Të gjithë kolegëve, qofshin këta fqinj apo jo, përfshirë edhe Greqinë, gjatë këtyre dy viteve e gjysmë punë që është bërë për hartimin e këtij ligji, i kam kërkuar që të na parashtrojnë gjithashtu eksperiencën e vendeve të tyre. Ne kemi qenë dhe mbetemi të hapur për të studiuar çdo lloj modeli për pakicat, duke përfshirë edhe modelin grek, nëse një i tillë ekziston”, ka deklaruar Bushati.
Më tej, ministri iu përgjigj edhe presidentit të Greqisë, i cili e cilësoi “amatorizëm ndërkombëtar” lëvizjen e Shqipërisë: “Amatorizimi kam frikë se duhet kërkuar nëpër kryeqytetet e vendeve të tjera, por kurrsesi në Shqipëri”.
I pyetur nëse Bushati i druhet një vetoje greke, ministri tha se kjo nuk do të ishte në interes të asnjërës palë: “Nuk kam asnjë arsye as të mendoj, për asnjë çast, e as të besoi që një shtet, qofte ky edhe fqinji ynë Greqia, do të ishte i interesuar për të vendosur veton ndaj Shqipërisë, sepse e kam thënë dhe do ta them, nuk është as në interesin e Greqisë dhe as të Shqipërisë që të kemi të tilla ngjarje, por politika e megafonit ditën e diel duhet t’ia lërë vendin ditës së punës në marrëdhëniet mes dy vendeve tona”.
Bushati u pyet nga gazetarët edhe nëse ekziston mundësia që Greqia të mund të bllokojë pranverën e ardhshme vendimmarrjen në institucionet e Bashkimit Europian për çeljen e negociatave.
“Raportet mes vendeve fqinje nuk ndërtohen mbi ultimatume. Marrëdhëniet mes Shqipërisë dhe Greqisë dhe të gjitha temat e hapura mes vendeve janë pjesë e një procesi diskutimi në rrugë diplomatike,” përfundoi ai.
