Shkodra është përgjakur që në orët e para të ditës, ku një ish-punonjës policie dhe bashkëjetuesja e tij janë vrarë me armë zjarri brenda në automjetin e tyre, në sy të fëmijës një vjeç e gjysmë. Ngjarja e rëndë është shënuar në vendin e quajtur “Rruga e gjerë”, në lagjen “Naim Gjylbegu”, poshtë pallatit ku banonte çifti. 35-vjeçari Boran Bercama dhe bashkëjetuesja e tij Silvi Ndoci, rreth 27-vjeç, janë qëlluar me armë zjarri pistoletë, nga një distancë e afërt, rreth orës 1:30 pas mesnate, ndërsa trupat e pajetë janë gjetur në orën 6:40 të mëngjesit.
Policia, pasi ka zbardhur skemën thotë se foshnja që ndodhej në prehrin e gruas së vrarë, ka shpëtuar nga plumbat. Më pas, një ambulancë e ka marrë fëmijën dhe e ka transportuar për në spital.
Dyshimet paraprake, ende jo zyrtare
Sipas grupit hetimor, autorët dyshohet të jenë të paktën dy persona, të cilët kanë ditur mirë çdo lëvizje të viktimave. Në shënjestrën e tyre, përveç ish-punonjësit të policisë ka qenë edhe bashkëjetuesja, për të zhdukur çdo dëshmi të mundshme.
Nga dyshimet e policisë duket se bëhet fjalë për një krim të kryer nga profesionistë, duke parë saktësinë e goditjeve me armë zjarri, ndërsa autorët kanë qenë të maskuar, bën me dije “Top Channel”.
Aktualisht nuk dihen as motivet dhe as autorët e ngjarjes së rëndë, ndërsa dyshimet e para hidhen për ndonjë konflikt të kohëve të fundit të ish-punonjësit të policisë.
Viktima kishte 6 muaj që kishte dhënë dorëheqjen nga policia
Boran Bercama kishte dhënë dorëheqjen para rreth 6 muajsh nga policia, ku shërbente si punonjës i Policisë së Rendit me patrullat. Policia ka shoqëruar disa persona, që dyshohet se kanë dijeni apo lidhje me ngjarjen. Po kështu janë sekuestruar edhe kamerat e sigurisë të disa bizneseve aty pranë, për të mësuar më shumë mbi lëvizjen e autorëve.
Njoftimi i policisë
“Më datë 15.07.2018, ora 06:40, në lagjen “Naim Gjylbegu”, Shkodër, në automjetin me targa AA006HA, janë gjetur të vrarë me armë zjarri shtetasit B. B. dhe bashkëjetuesja.
Menjëherë kanë shkuar në vendngjarje sherbimet e policisë dhe grupi hetimor, ku nën drejtimin e Prokurorisë së Rrethit Shkodër po kryhen veprimet për sqarimin e rrethanave të ngjarjes”.
