Ambasadori i BE-së në Tiranë, Luigi Soreca, e ka konsideruar një “pavarësi të madhe të gjyqësorit”, vendimin e Apelit të Gjykatës së Posaçme për të dënuar me 3.4 vite burg ish-ministrin e Brendshëm, Saimir Tahiri. Nga Korça ku mori pjesë në një takim me fermerët dhe zyrtarët e Ministrisë së Bujqësisë, Soreca shmangi komentin për çështjen Tahiri.
“Nuk komentoj për procedura në vijimësi, apo për çështje specifike, por mund të them se të shikosh disa, megjithatë po të shikohen disa nga vendimet e fundit, të gjykata shihet një pavarësi më e madhe e gjyqësorit. Dhe ky është lajm i mirë për gjyqësorin. Ne shohim sinjale të mira nga puna e gjyqtarëve dhe prokurorëve, nuk është e mjaftueshme. Ne presim më shumë nga të gjithë njerëzit e drejtësisë”, tha Soreca.
Dy ditë më parë, Rama nuk e komentoi vendimin e gjykatës për të dënuar me burg ish-ministrin Saimir Tahiri. Gjatë pyetjes së gazetarëve në konferencën për shtyp, kreu i qeverisë tha se e ka ditur mirë se çfarë ka bërë, kur ka udhëhequr Reformën në Drejtësi dhe po të kthehej pas në kohë do të bënte të njëjtën gjë.
