Real Madrid vërtetoi edhe njëherë se është ekip i madh kur luan në Champions League, pasi shkatërroi në “Allianz Stadium” Juventusin me rezultatin e thellë 3-0. Një Ronaldo i frikshëm që shënon dy gola mjaft të bukur dhe Marcelo që me shumë mundësi vulos kualifikimin në gjysmëfinale.
Ylli portugez e gjen golin e parë që në minutën e 3’ të takimit, pas një pasimi fantastik të Iscos. Një gol që trondit Juventusin dhe e detyron të hidhet në sulm duke lënë shumë hapësira prapa.
Juventus u përpoq të reagonte dhe faktikisht luajti mirë në pjesën e parë, por Keylor Navas mbrojti portën e tij nga tentativa e Gonzalo Higuian, ndërsa nga krahu tjetër Toni Kroos goditi traversën për spanjollët.
Pavarësisht sulmeve të Juventusit është sërisht Ronaldo që gjen rrugën e rrjetës. Një gol fantastik me roveshatë që hesht të gjithë të pranishmit në stadium. Ky ishte goli i 14 në këtë edicion i Ronaldos, një rekord i ri për të.
Kjo ishte ndeshja e dhjetë radhazi që Ronaldo shënon në Ligën e Kampioneve, duke vënë rekord absolut, ashtu si është rekord fakti që askush më parë nuk ka shënuar 22 gola në ndeshjet çerekfinale të kësaj veprimtarie.
Juventus mbeti me dhjetë futbollistë, pas kartonit të dytë të verdhë të marrë nga Paulo Dybala dhe miqtë përfituan nga superioriteti numerik, duke realizuar golin e tretë me anë të brazilianit Marcelo, i shërbyer nga “fantastiku” Ronaldo, që praktikisht “vret” këtë çerekfinale…
0-3 në Torino, as në ëndrrat më të bukura të Zinedine Zidane nuk ishte parë diçka e tillë. Real Madrid marshon drejt titullit të tretë radhazi në Europë, ndërsa Juventus ka nevojë për më shumë se një mrekulli në “Santiago Bernabeu”.
