Britania e Madhe shkon sot në zgjedhjet legjislative. 40 mijë qendra votimi u hapën sot në orën 07:00 në të gjithë vendin për zgjedhjet e parakohshme legjislative, të konsideruara me rëndësi historike duke pasur parasysh Brexit.
Zgjedhjet vijnë nën masa tepër të rrepta sigurie, referuar ngjarjeve terroriste që ndodhen së fundmi në Londër.
Që nga zonat malore të Skocisë e deri në Londër, Birmingam, Mançester, Liverpul apo Glasgou, më shumë se 47 milionë britanikë do të votojnë deri në orën 22:00.
Zgjedhjet e përgjithshme në Britani, do të duhej të zhvilloheshin në maj të vitit 2020, por u caktuan për më 8 qershor pas vendimit të kryeministres Theresa May për të shkuar në zgjedhje të parakohshme.
Mes partive kryesore që zënë vend në Dhomën e Ulët të Parlamentit të vendit, që përbëhet nga Anglia, Uellsi, Skocia dhe Irlanda e Veriut, janë Partia Konservatore e kryeministres May, Partia Laburiste e Jeremy Corbyn, Partia e Liberaldemokratëve e Tim Farron, Partia e Pavarësisë e Mbretërisë së Bashkuar (UKIP) e Paul Nutall dhe Partia Nacionaliste Skoceze e Nicola Sturgeon.
