Kryeministri britanik Boris Johnson, pritet që të njoftojë një bllokim kombëtar javën e ardhshme, pasi ekspertët shëndetësorë i këshilluan se është e vetmja mënyrë për të shpëtuar Krishtlindjen.
Johnson pritet të bëjë njoftimin të hënën, me kufizimet që fillojnë të mërkurën. Mendohet se ato mund të zgjasin deri më 1 dhjetor.
Shkencëtarët nga komiteti ‘Sage’ paraqitën dje shifra të zymta, ku tregohej se Covid-19 po përhapej shumë shpejt, dhe me këto ritme situata do rëndohej ndjeshëm.
Që prej fillimit të pandemisë deri më tani, në Britani kanë humbur jetën 46.222 persona dhe janë infektuar 989.745 të tjerë. Sakaq, në gjendje të rëndë për jetën janë 975 persona.
Referuar masave kufizuese, pritet që pub-et dhe restorantet të mbyllen për javë të tëra, duke shkaktuar dëme të mëtejshme në ekonomi. Ndërkohë, shkollat pritet të qëndrojnë të hapura. Një burim tjetër pohoi se edhe dyqanet me produkte që nuk janë shumë të domosdoshme, do të mbyllen.
