Zv/ndihmës Sekretari amerikan i Shtetit, Hoyt Brian Yee, ka vlerësuar qëndrimin final të dy liderëve politik në Shqipëri, që çoi në arritjen e marrëveshjes, për të cilën vet ai i tha fjalët e fundit.
Me modesti, duke mos i njohur merita vetes për paktin e arritur, zyrtari i lartë amerikan i ka vlerësuar veprimet e Ramës e Bashës si të guximshme dhe fleksibël.
“Opozita në Shqipëri ndërmori një vendim të guximshëm për të ndryshuar qëndrimin e saj duke vendosur të marrë pjesë në zgjedhjet që u shtynë. Por, këtu përmedim edhe Ramën, të cilit iu desh të gjente fleksibilitetin e nevojshëm për të bindur opozitën të kthehej në garë. Kjo është shumë fitimprurëse për vetë Shqipërinë”, theksoi zyrtari amerikan.
Yee ka komentuar edhe situatën politike në Maqedoni, e cila gjithashtu u zhbllokua pas vizitës së tij atje. “Suksesi u takon liderëve të vendeve që ishin të afta të ndërmarrin vendime të vështira, si Maqedonia, ku presidenti Ivanov vendosi t’i japë mandatin koalicionit në Parlament që ka mazhorancën, në mënyrë që t’i hapë rrugë formimit të qeverisë”, tha ai.
Zëvendës ndihmës sekretari i Shtetit për Evropën dhe Azinë, Hoyt Brian Yee, vizitoi pak ditë më parë një tur në vendet e rajonit Shqipëri, Maqedoni, Kosovë e Mali i Zi.
Hoyt Brian Yee, duke folur para nënkomitetit të Kongresit për Marrëdhëniet me Jashtë, pas kthimit nga turi në Ballkan, deklaroi se Moska, po përpiqet që të frenojë integrimin e këtij rajoni me mjete financiare dhe politike, duke e përkufizuar këtë si ndikim malinj të Rusisë në Ballkan.
